Ang kape nga naman...

Nagka-kape ako sa canteen ng aking hamak na unibersidad at binuksan ni manang ang telebisyon. Hinhalo ko maiigi ang kape ko... Hinalo ko ng hinalo...

News ang palabas pero may siningit na Pinoy Big Brother sa news at pinakita ang saglit sa loob nang nasabing ‘bahay’. Dahil sa pagka-inosente ko nasabing palabas ay nagkataka kung bakit may foreigner na nakabihis ng traditional dress ng mga Pinay noong panahon ng mga Kastila. Tapos ay lahat sila ay sumasayaw sa isang ‘jingle’ kahit antok na antok pa sila. At biglang nag-commercial break at saktong campaign ad ng isang tumatakbong senador ang pinalabas.

Dahil nga napag-aralan ko ang advertising ay may ideya ako kung gaano na kalaki ang nagastos nila sa radyo, telebisyon at print. At sumahin pa natin ang mga hayop na posters. Mukha na tuloy mummy yung mga poste eh. Isipin mo, ang kakapal ng mukha nilang ilagay ang mukha sa sangkaterbang poster na pwede ng takpan ang kalahati ng Pilipinas.

Isipin mo, kung susumahin mo ay limpak-limpak nang salapi ang nagastos nang mga kandidato natin lalo na sa mga tumatakbong senador. Marahil ay pwede na nilang bilhin ang Pilipinas kung pagsasamahin lahat ng gastos nila.

Ngayon marahil ay nagtataka kung anong kinalaman ng Pinoy Big Brother sa Eleksyon?

Eto ang ideya ko, paano kaya kung yung mga tumatakbong senador ang ilagay natin sa loob ng bahay ni ‘Kuya’, malamang eh panoorin yan ng buong bayan, at marahil ay papanoorin ko yan!

Sa ganoong paraan ay makikita natin ang totoong kulay nang mga ito. Kung sino ang matakaw, pala-mura, madaldal, ang hindi talaga matalino at bihirang maligo.

Kung sino ang maarte, hindi marunong mag-saing at hindi marunong makipag-kapwa tao.

Hindi natatapos yan diyan, matapos kung humingi ng tulong sa mga kaibigan kong nanonood ng PBB ay dapat ding pasayawin ang mga feeling senador sa sarili nilang jingles sa loob ng isang araw. Kung alam lang nila kung gaano na akong sukang suka sa mga jingle nila. Para naman ma-umay sila sa sarili nilang pangalan.

Tingnan natin kung mabubuhay sila ng walang goons este bodyguards sa tabi nila.

At oo nga pala, tuwing gabi ay magkakaroon ng debate ukol sa mga balak nila, makikita din natin ang pagkakaiba ng pananaw ng mga pulitiko.

Sana ganon nga, kung nangyari ito ay wala silang TV, Radio and Print ads diba? Edi ang linis pa ng kapaligiran diba? Tipid pa sa gastos dahil ang dapat lang gawin ay magpakatotoo sa harap ng camera, ang mata ng madla.

Oo nga pala, may tanggalan dun diba? Edi lahat ng magsasabi ng salitang ‘PANGAKO’ ay maalis ng ora mismo!

Sa mga lokal na kandidato naman, magpatayan na kayong lahat para wala ng matira ni isa sainyo.

UMAYGAD, wala na akong magawa.